2009 წლის 15 დეკემბერს, სპეციალურ ოპერატიულ დეპარტამენტში შემოსული ინფორმაციის თანახმად, აღიძრა სისხლის სამართლის საქმე და დაიწყო წინასწარი გამოძიება  ფულის გამოძალვის მიზნით  თურქეთის მოქალაქის,  ჰასან ბაირახტარის მძევლად ხელში  ჩაგდების ფაქტზე. მუშავდებოდა სხვდასხვა სახის ოპერატიული ინფორმაცია და საგამოძიებო ვერსია.  ინფორმაციის შემოსვლიდან მე-5 დღეს, სპეციალური ოპერატიული დეპარტამენტის თანამშრომლების მიერ გატარებული ოპერატიული საგამოძიებო და სამძებრო ღონისძიებების შედეგად, ჰასან ბაირახტარის  გატაცების და მძევლად ხელში ჩაგდების ფაქტზე დააკავეს ორგანიზებული დანაშაულებრივი ჯგუფი: 1963 წელს დაბადებული ზურაბ ინაშვილი, 1969 წელს დაბადებული დავით სააკაშვილი და 1967 წელს დაბადებული ვაჟა ნებიერიძე.

გამოძიების შედეგად ამოღებულია წინასწარ გამზადებული ავტომანქანა, რომლის საბარგულში დამონტაჟებული  იყო თვითნაკეთი მექანიზმი, რისი მეშვეობითაც  უნდა მომხდარიყო თანხის  გადაცემა. დაკავებულებმა დანაშაული აღიარეს. გამოძიება მიმდინარეობს საქართველოს სსკ-ის 144-ე და 179-ე მუხლებით. გამოძიებას აწარმოებს სპეციალური ოპერატიული დეპარტამენტი.